3 juillet 2005 : Elodie LÉTAPIN, élève de Terminale S, a choisi pour le BAC "Option Créole" (qu'elle a réussi), dossier sur le Dub'n'Ka,

Dominik Coco, en tant kè "gran papa a konsept lasa"

Interview :

1. Ki jan Dominik ka ekspliké kè fosé-la ki ka séparé pèp gwadloup an dé : générasyon a granmoun, é générasyon a jèn moun pa rapot a mizik, fin pa vwè jou? An ka pansé kè konsept a dub'n'ka vin kréyé pou pé fè fosé-lasa disparèt, é an ka sipozé kè a pa on konba ki fasil, alos, ka on rékonsilyasyon té pé rapoté nou ?

COCO : Padavwa moman-la té rivé. Dépawfwa, ou pé rivé tro bònè, men dòt fwa, ou ka rivé a tan. Dub’n’Ka-la rivé a on moman kè tout moun té bizwen sa. Dè plizanpli, sé moun-la vlé savé ola lonbrik a yo téré !

2. Ki jan lidé a konsept-lasa vin an tèt a Dominik, é ki jan i rivé fè jèn kon granmoun aksepté poté grendsèl a yo adan antrèpriz-lasa ?

COCO : Tou dabò, tou sé moun-lasa sé mizisyen. Kidonk ni on biten ka ini nou : jouwé mizik . Chak moun té ka vougaré an ti-kwen ay, men nou sé on sèl gran fanmi an ti péyi gwadloup lasa. An vérité, nou té bizwen sa

3. Ki bilan i ka tiré dè Dub'n'ka? Ka i apran ? É Es rékolt a sa i simé té a gou a-y ?

COCO : Solidarité, inité, kilti, pawtaj...On pakèt a bonbiten sòti adan èspèktak-lasa. Sa fè kè lé pli jenn vin kònèt éritaj a gwoka-la plis, dòt dékouvè-y. Sa fè vwè kè ki ragga, ki gwoka sé mizik lari, sé mizik a moun ka soufè, sé mizik a konba pou vansé. Sa fè vwè kè sa ki taw sé taw. Kon likibè ka di : chak zozio ni chan ay ki tay !

4. Es sa té fasil dè kombiné mizik a yè évè mizik a jodijou ?
An ki mannyè i ka vwè gwoka ? i ka vwè dancehall ? É pouki biten i ka pansé ( an ka sipozé) kè konbinézon a sé dé manman mizik-lasa té ké klé a rékonsilyasyon a générasyon a yè èvè ta jodijou pa rapot a sa ki mizik gwadloup ?

COCO : Dèpi kon ou fèt, an didan aw, tout sa ou kouté ka rété on ti koté an lèspri aw. Ou près paka envanté, ou ka roupran, é mété-y an mannyè aw. Men ni on boten pou pa jan oubliyé, gwoka sé mizik a gwadloupéyen ! Dè la menm, nou fè biguine, zouk. Reggae, ragga, sé mizik a fwè karayib, sé mizik a nèg. Ou pé pa anpéché on nèg enmé mizik a dòt nèg. Mizik pani frontyè ! Men fow sa gadé sa ki taw, koulè aw, mannyè aw ! Mèt gwoka-la a koté pa bon ! Sé itilzé tout mannyè ki ni pou nou palé é fè moun konprann sa ki ni a konprann. Pa pè mèt ti gout a dòt mizik pou fè taw vansé.

5. Es, an tan kè papa a dub'n'ka, i ké kontinyé lité pou fè konsept-lasa rété doubout pou rédé pèp gwadloup vansé ?

COCO : Ou pé di sa !!! Sa kay pli lwen ki mizik menm, sé inité é stabilité a on pèp ki pou fèt ! On tras ki ni a lésé, pou kè bato annou pa pati a la dériv.

Si zo ni dot biten a rajouté, pa jéné-zot, an pozé séti kestion-lasa pou fé-zot sav an substans sa an té vlé sav pou pé konstrui dosyé an mwen. An ja ni foto davwa an té vin asisté a Dub’n’ka é an dwèt di kè an té soti kontan pas sa té malade! An ka di zot mèsi, mèsi on lo on lo on lo dè réponn mwen.

COCO : Mo an mwen : Pa lésé tanbou tonbé. Aprann jouwé-y, palé dè-y, fè sa ki ni a fè avè-y, padavwa lè an kay adan dòt péyi, an ka vwè fòs a mizik lasa. Chak jénérasyon ka vwè lavila an mannyè ay, sé nowmal, é sé sa ki ka fè biten la vansé. A pa tou di palé dè gwada, men fò pansé é aji gwada !!!